La Coustume au chapitre De relief.

L’En doit sçauoir qu’il y a fiefs en chef, et fiefs qui sont par dessus. Les fiefs en chef sont qui en chef sont tenus des seigneurs : si comme les contez, les baronnies, les fiefs de Haubert, les franches sergenteries, et les autres fiefs qui sont tenus en chef, et ne sont submis à nul fief de Haubert. Les fiefs de par dessous sont qui descendent des fiefs cheuels, et sont submis à eux : si comme les vauassories qui sont tenus par sommage, et par seruice de cheual, et les autres fiefs qui sont tenus par acres du chef seigneur.