Ledit François.

E T pource qu’auons donné à aucunes personnes, la chasse d’aucunes nos forests pour chasser à toutes bestes, lesquelles personnes ont donné et donnent à autres leursdites chasses en icelles : Ordoné est que nul n’y pourra chasser, si ceux à qui elles sont données n’y sont, ou leurs gens, et que ce soit pour eux et en leurs noms.

Item auons defendu et defendons à nos Officiers esdites forests, et à tous autres demourans à deux lieues à l’entour d’icelles, de ne porter ni auoir en : leurs maisons, arbalestes, arcs, escopetes, ou haquebutes, cordes, filez, collets, tonnelles, ou autres engins pour prendre lesdites bestes et gibier : excepté ceux qui ont droict de chasse, ou priuilege de nous.

Ce n’est pas de ce temps seulement qu’il est defendu d’user desdits bastons et engins. au faict de la chasse. Car au Tit. De pace tenen, in vsi. feudo. il est ainsi escrit, Nemorhetia sua aut laqueos, aut alia quelibet instrumenta ad capiendas venationes tendat, nisi ad vrsos, apros, vel lupos capiendos. Ce qui n’est pas sans bone raison, pource que par tels engins on ne cerche que le gain et la proye, et non pas le plaisir, recreation et exercice, pourquoy la chasse doit estre prisee. Et comme en la guerre la victoire est plus louable, quand elle est acquise par la vertu et prouesse des combatans, qu’elle n’est pas quand les ennemis sont surprins parruses et finesses : pareillement la proye qui tombe par la force des hommes. et des chiens, est trop plus agreable, que celle qui est prinse à la rets ou autres engins. En l’un se monstre le plaisir d’vne vraye noblesse : en l’autre vne rusticité et passe-temps. mecanique. L’un donne à cognoistre la vaillance, et le bon coeur des hommes, et l’autre sent son auarice. D’auantage de tels engins prouient la depopulation des bestes et oiseaux, et mesmes en portant lesdits bastons à la chasse, plusieurs querelles, noises et debats se peuuent ensuyuir, en violant la paix et tranquilité publique.