Ledit Henry au dit an 1557.

C Ombien que par les ordonnances de l’Amirauté de l’an 1543. nous vayons accordé aux bourgeois des nauires nos suiets, le quart du butin des prinses que pourroyent faire leurs vaisseaux à l’aduenir, afin de leur donner moyen de faire construire de plus grans nauires, iceux armer et fournir de bonne artillerie, et munitions requises pour faire la guerre, encores que par le passé ils n’eussent accoustumé d’en auoir que demy quart. toutesfois pource que bien souuent il se trouue beaucoup de difficultez et altercations entre lesdits bourgeois et auitailleurs, en tant que lesdits bourgeois veulent bien souuent alléguer qu’ils ne sont tenus qu’à bailler leur simple corps de nauire, auec l’artillerie la bouche ouuerte, sans faire soultes à mettre le biscuit, ne mettre en mer les prouisions qui leur sont necessaires pour le radoub de leursdits vaisseaux et bateaux : voulans toustiours s aider d’vne vsance qu’ils auoient auparauant que ledict quart de butin desdites prinses leur fust accordé : dont est aduenu souuentesfois que voulant dresser vne entreprinse par aucuns particuliers, tant sur noz nauires que ceux de noz subjects, elle a esté rompue et delaissee souz ombre de telles difficultez : pour lesquelles vuider, et à icelles obuier, en estendant le contenu audict article, Nous auons declaré, voulu et ordonné, deClarons, voulons, ordonnons et nous plaist, que chacun bourgeois de nauire sera tenu fournir et agreer sondit vaisseau bien et deuëment, d’artillerie, boulets, pinches, maches, toises, coings de toutes fortes, et autres menus vtensiles seruans à ladicte artillerie, plomb en platine, cuirs vers, soultes, auirons, piques, arbalestes, planches, brey, goutren, elou, fiches, compas, horloges, plombs et lignes à sonder, et’autres choses requises à porter en mer pour la seureté desdicts Nauires. Et les aduitailleurs les vitailles, poudres, lances à feu, fausses lances, et autres menus vstensiles, desdictes vitailles, comme bidons, corbillons, lanternes, gamelles, mannes, et autres choses qui seruent pour vser lesdictes vitailles : auancer les coffres de barbiers, suages, touages, lamnages, qui se leueront sur la haute somme, au double prix, le dixiesme estant leué. Pareillement seront lesdits auitailleurs tenus fournir les deniers des singlages, et auaries raisonnables qui seront faictes par la leuee desdits equippages, qu’ils reprendront au double prix sur iceux, de la prinse ou prinses qu’ils pourront faire.