Charles viij.

V Oulons et ordonnons qu’aux iours ordinaires soit fait rolle, selon lequel les causes se despescheront sans interruption, sinonque pour l’expedition des pauures et miserables personnes, choses vrgentes et tres-necessaires, et autres considerations pour le bien de Iustice, soit necessité de bailler audience sans garder l’ordre dudit rolle, Sur quoy nous enchargeons l’honneur et conscience de nos Presidens.

Et pource qu’à l’occasion des audiences extraordinaires qui se donnent aux iours ordinaires esquels se doyuent expedier les bailliages, souuent aduient que lesdits rolles à la fin dudit Eschiquier ne sont pas expediez ainsi qu’ils deussent estre : Ordonnons et estroitement enioignons à nosdits Presidens et Conseilliers de nostredite Cour, qu’ils despeschent lesdits rolles ordinaires sans les interrompre par telles plaidairies extraordinaires : sinon que par nostredite Cour pour aucune grande et vrgente cause eust esté deliberé donner icelle audience extraordinaire.