Le Style.

E T si aucunes parties sont appointees à bailler leur plaidoyé par escrit, par le Style de ladite Cour, elles escriuent en quatre contes seulement : c’est à sçauoir causes d’appel, defenses, repliques, et dupliques : lesquels se doyuent bailler dedans trois iours, ou tel autre temps qu’il plaist à ladite Cour arbitrer. Et par faute et neglignece de fournir et bailler lesdits plaidoyez dedans ledit temps, defaut sera donné à la partie diligente contre le negligent. Lequel defaut de bailler appelé et rapporté en la manière accoustumée, si c’est defaut de bailler causes d’appel, emporte contre l’appelant ou complaignant, gain de cause, par le Style de la Cour de Parlement de Normandie. Mais si l’appelant est en defaut de bailler replique, ou que l’appelé ou intimé soit negligent, delayant ou en demeure de bailler defenses, ou duplique, il dechoit seulement de ce qu’il a à faire, et est condamné aux despens.