Le Style.

I L n’est loisible ne permis d’interietter appel, ou prendre doleace, ny autre pouruoy des arrests et iugemens donnez par ladite Cour : ains doyuent estre et sont mis à execution de poinct en poinct selon leur forme et teneur, nonobstant oppositions, appellations et autres voyes quelconques. Et si n’est loisible aux parties ny à leur conseil d’impugner et debatre lesdits arrests. Et si les parties ou leurs conseuls s’efforcent ou ingerent temerairement de faire le contraire, ils doyuent estre condamnez en grosses amendes. Et neantmoins desdits arrests et iugemens donnez par ladite Cour de Parlement, est loisible de proposer erreur en la forme et manière qui sera dite cy apres. Mais l’execution desdits arrests ne peut estre retardee sous combre d’icelle proposition d’erreur.